راكوبة ابريش

والله كلامك يا حذيفة التقول شارب ليك حجر جراك
لو اى زول اتخيل كلامك دا كويس بلقى نفسو جوة الراكوبة
ويا فقدابى لية ما سالت من كلمة( كُجرة ) والله خايف الناس تفسرها بى الكجور وكدة
والنقد بين بنت السعودية وحذيفة جعل الراكوبة فى اجتماعات ساخنة كما جعل رواد المنتدى بالدخول فيها يومياً
ومناقشة بعض التعديلات على الراكوبة
اذا كانت حياتنا بغير اخطاء والاعتزار لا ياتى الا عندما نخطاء فلا وجود للاعتزار فى حياتنا اليومية ويصبح مجرد كلمة انشائية
الاعتزار سمة جميلة يجب ان نتحلى به جميعاً عندما نخطاء فهو يكبرك ويزيد من قيمتك عند الشخص الاخر
وبنفس القدر يرد لذالك الشخص حقة
سامحنى غلطان بعتزر
فهموها غلط
الليلة مفروض تعملو لينا( جبنة)قهوة يعنى ما تفهوها ذى فلان وفلان كاربة

اولا نرحب بضيف الكرسي الساخن الخال رحمة الله ونتمني ان تكون جبنة عبد الحي دي عجبتو. بس ما قال لينا دا بن حبشي ولا برازيلي.
ويا ود الدقناوي مقبولة الهدية وان شاء الله في الافراح.
تخريمة:
ياكاربينو انا لو شربت حاجة غير الجراك دا كان الصورة تكون ابلغ من كدا.
ويا ادمن عليك الله هسي تربية الحبوبات دي ما بسكر.

حباب اهل الراكوبة عساكم طيبين ومبسوطين قلنا نسلم عليكم ونتفقد احوالكم باقي لينا كم يوم ماقعدنا معاكم
وشفنا حالكم وحال راكوبة جدنا ابريش، لكن ماشاء الله وعيني باردة (يافقدابي )ناسكم كترو وسوقكم حرا
والراكوبة فاتت خيمة الشروق ،واظنها وصلت الصفحة السادسة ،ونقترح علي اخوانا الوصيفاب الفي الراكوبة
يسوا لينا فيها طابق تاني (زي استادهم )ونطلب فقدابي بتخصيص اركان بالراكوبة: واحد لنقاش الكورة علي انغام الشيشة
وواحد لاخبار الحلة وواحد للسياسة وواحد للغناء والشعر ومكان للشاي والجبنة وقدرة فول وكمان وركن مقابل الباب للنوم
يلا سلام لمن نلقاكم تاني

Boka كتب:حباب اهل الراكوبة عساكم طيبين ومبسوطين قلنا نسلم عليكم ونتفقد احوالكم باقي لينا كم يوم ماقعدنا معاكم
وشفنا حالكم وحال راكوبة جدنا ابريش، لكن ماشاء الله وعيني باردة (يافقدابي )ناسكم كترو وسوقكم حرا
والراكوبة فاتت خيمة الشروق ،واظنها وصلت الصفحة السادسة ،ونقترح علي اخوانا الوصيفاب الفي الراكوبة
يسوا لينا فيها طابق تاني (زي استادهم )ونطلب فقدابي بتخصيص اركان بالراكوبة: واحد لنقاش الكورة علي انغام الشيشة
وواحد لاخبار الحلة وواحد للسياسة وواحد للغناء والشعر ومكان للشاي والجبنة وقدرة فول وكمان وركن مقابل الباب للنوم
يلا سلام لمن نلقاكم تاني

والله كلام عين العقل يا بوكا واقتراحك جميل جدا وانشاء الله انا هنا معاى في الفن خليفة ود الحاجة وحاج صلاح وعبد العزيز حسونة عندهم زكريلا جميلة من الزمن الماضي
وعندنا في الرياضة امين احمد العبيد(الدينمو) وجمال ابراهيم (الزهرة ) وخليفة (النصر ) ود رابعة الشاطي )وانشاء الله نطلع منهم بحاجات تعطي راكوبة ابريش حاجة تانية
تخريمة (الطابق الثاني لابد ان يكون بمواصفات منهدسين عشان ما يقع فينا والمواد ما تكون مغشوشة )
لان الاساس اصبح لاتهزه رياح ولا شعفوفة ولا غيرها فهنئيا لنا بهذا الاساس الذي اسسه فقدابي وهو من احفاد ال ابريش.
يافقدابي جهز اللمبة عشان نساهر في الراكوبة لان الناس بقت داخل كتيرة عشان كدا في ناس بقو يجونا بالليل فديل لازم نولع لهم اللمبة جهز الجاز وجهز شريط اللمبة وبِل(بكسر الباء) الشريط من بدرى في الجاز وماتنسي الكبريت ومع نصلى المغرب دائرين شاي لبن مغنن اها كلم واحد في الجماعة يحلب الغنم ويجيب اللبن .
ولنا عودة

حبابك الف يابوكا وابقي لاجوة.
وعازمنك كسرة عصيدة بملاح ويكاب , فتريتة صر لمن محمرة وماملخبطة بي دقيق ويتا ولا سيقا, ودراشا عيش مرحاكة. وويكتها جديدة جاية من الصعيد ,وقالبنها في قدح كبير وسط الصينية بوخا يلوي وجنبها صحين لاحوسة او وحواحة بي ليمون.
ملحوظة:
يابوكا وابوالقاسم انا بشوف راكوبة ابريش دي احسن تكون كد من غير تخصيص لاركان النقاش ولا شنو يافقدابي .
كسرة:
ماتبقي لينا زي .............. تقول اللاحوسة دي شنو.(عامل شجرتك الزي الشعفوفة دي)

مشكورين ياقاسم وقرش
ونطلب من الادمن تثبيت الراكوبة علي قمة المنتدي
حتي تصبح متكأ للمقيل والاسترخاء والانس الجميل
والذكريات الحلوة

الاخوه الاعزاء / سماعين . حذيفه .عبدالحميد.حسبو.الفاتح. عبدالحى و بخارى

تحيه طيبه وحبابكم عشره بلاكشره . وانا عازمكم انتو وكل رواد ركوبة ابريش قهوه كاااااااااااااربه شديد من يد الوالده / بخيته بت ابريش .الله يديها العافيه والعمل الصالح .وتهدى قصيدة الشيخ الجيلى وهو ناظر الخط فى وقتها حيث يذكر فيها البشاقره ويرمز لها بى (ابريش )0 ويقول فى قصيدته
يا ود باقير ما قلت خبير وين السلمه و درب البير
يا شيخنا كمال الشفقه تطير هداك الوادى ودرب ام جير
الى ان يقول
جا بالتمدات وغشى النابتات
عندابريش زملا شادات
تعال بى فوق فوت الحادات
والتمده ارض منخفضه ويقصد بها مشروع ابراهيم سعيد الحالى
النابتات هى الشرب والنابتى الشرقيه
الحادات هى التكيلات والعيدج نسبة للارض البيضاء فى هذه المنطقه
الى ان يقول
سيال ام برعه اديهو قفاك
فى ود راوه ساعه كفاك
شق السوق شوف الهاماك
عوض الجيد و اولادو سلام ( شيخ قرية ود عشيب )
لافى الحر بدور لى كلام
والشم ان غابت فى عد النور بنلام . ( كان له عهد مع والده بان لايغيب الشمس فى قرية عد النور )
اها يا اللخوان اخدو راحتكم تحت ضل راكوبة ابريش ام همبريبا باااااااااااااارد

فقدابى

هلا يافقدابي.
اولا نحي الوالدة بخيتة بت ابريش من هذا المنتدي ونتمني لها الصحة والعافية والجبنة مقبولة.
وثانيا نعرج علي اللوحة الفنية الرايعة للشاعر الجيلي الذي جسد خواطرة ليترجمها لسانة فيخرج لنا تلك اللوح الفنية لنتلقاها فتداعب مشاعرنا ونراها تحاكي روعة المكان لجغرافية المنطقة ووهج والزمان لاستصحابها شخصية بقامة ابريش لة الرحمة.
كسرة:
ياكاربينو جبنة اليوتيوب راحت في حق الله.
وتقبلوا مرروي...

تحية ليك ياعمدة راكوبة ابريش في المنتدى وتحية خاصة للخالة بخيته وللخالة فاطمة والخالة سيدة وربنا اديهم الصحة والعافية وجهز الجبنة جاى معاى ود الحاجة ومعاى حاج صلاح وعبد المعطي ودحمد طالبين جبنة جنزبيلا مايخلص
وجبنة هناك رائقة عند بنات ابريش تسوى الدنيا بحالها

ما تهبش يا ابو النسب

ياكاربينو شغلنا حنغير من جبنة فقدابي ونتوجه لى جبنتك
وزيادة الخير خيرين


اتزودى

تسلم يا ابوالقاسم مرحب بيك فى جبنتنا وبنحاول نرسل اسماعيل مصطفى لى فقدابى عشان اجى اشرب معانا
بس يا فقدابى ما تنسى تجيب معاك رطل سكر فى علبة ووقية عرق وبن حبشى
رايكم شنو نعمل جدول فية الجبنة يومياً على زول
والله الراكوبة يومياً ذايدة ذى ذيادة العرس اليومين ديل

شكيتك على منو يا .... عملتها فينا

الله ادينا الفى مرادنا

تحية وتحيات للاخوة والاخوات
تحية خاصة للاخ فقدابي والحاجة بخيتة ابريش
تحية لكل الشباب حذيفة كاربينو ابوالقاسم
والله يافقدابي كلام عمك الجيلي دا ابداع واظنها اغنية مشهورة
بس ماسمعت فيها الكلام الجبتو هنا دا بالخصوص عن مناطقنا
ولاتكون مجاراة للاغنية المعروفة بنفس القافية علي العموم حلوة
ورجعتني لفكرة كنت اسعي لتنفيذها ولم استطع وهي جمع كل الاغاني
والاشعار البتتكلم عن البشاقرة او عن ناس البشاقرة في الغناء السوداني
وانتهز هذه السانحة وادعو الجميع لتجميع الاغاني الفيها ذكر البشاقرة
........................
ياكاربينو مالك علينا جهجهتنا بي جبنتك دي وخليتنا نسرح بعيييييد
ولو ما اخاف من الكضب كنت قلت ليك شميت ريحة (القلوة)ه
.في الكمبيوتر .وبمناسبة القلوة دي اتذكرت قصة ضيف التكينة مع القلوة
.....................
اها يافقدابي لحدي مانصلكم (البكري)بكون كمل بس خلو لينا من (التني)كويس؟
تحياتي

اهل الراكوبة امسيتو عافية
الجماعة سبقونا في سواجة الراكوبة لازم نلحقن ونسدر تالا اللعوتة مرورا بالليد ونشرب لينا شاي مع عمي الطيوب اصلو سارح بلقوط الحلة في الليد وبعد داك نقطع لينا شبعة شبعتين من الليد نتكل بيهن الراكوبة عشان يروق المزاج لي جبنة بت ابريش وبعد داك نشوف قصة عمنا امحمد ودبابكر (دابي الليل) اطال الله عمره .فهي اشبة بقصة ابن بطوطه.
شده حمارتو بعد صلاة الصبح ونعل ابليس واتوجة الي الوادي (ارض منخفضة بالقرب من وداللمين تتم فيها الزراعة المطرية)لزراعة الفتريتة وبعد يومين اكمل عملة وقعد تحت كجرة من شوالات الخيش ليستريح قليلا وتوقف صاحب عربة لوري يسأل عن طريق الخرطوم .فرد علية انزل كدي اشرب ليك عكارةوانا بصل معاك ام ضبان وواريك الشارع .وفعلا نزل ام ضبان زار حسن وحسن وود ابجكة وبيت معاهم وشال لية دبليبة ومحاية واتوجة الخرطوم قعدلو فيها يومين زار الاهل والحبان وركب طوالي السريحة قعدلوا فيها يومين وطوالي غشي بت ابريش في الفقداب بيت معاها وشرب الجبنه ونزل البحر سلم علي اهلو في التكينة وقطع البشاقرة اتفقد العقاب .
بعد الرحلة الطويلة دي ناس البيت ماسالوه وين اكان بالرغم من وصول الحمارة قبل اسبوع لانهم متعودين علي كدة اصلو صاحب واجب وصلة الرحم عنده اهم من كل شئ .
بعد ما انجم شوية البت نادتو يابه اكب ليك الجبنة
قال ليها يابتي اكان متل جبنة بت ابريش كبيها
واكان ما متلها خليها ماتودري علينا طعم جبنتها
(بعد يومين يافقدابي طعم الجبنه ما ودر)
كسررررررة
سأل الولد : ياولد الحمارة علقت ليها
اراد الولد ان يمازحهة :يابي الحمارة ماجاءت
رد علية: يولدي انت قائل الحمارة انا البوريها الدرب علي بالطلاق هي الورتني الدرب
(حكي :عندما سأل والدة اين درب الوادي .قال لة اركب الحمارة براها بتوديك الوادي )

ولكم ودي

الاخوه والاخوات الاهل والاحباب /
كيف قيلتو وكيف امسيتو ؟
الاخ /حذيفه خالص تحيات الوالده. ابو القاسم تحياتنا لى ناس الرياض 0 كاربينو /فنجان قهوه بى شمالو يسوى الدنيا بى حالو 0الاخ بوكا / هذه القصيده اغنيه مشهوره للفنان نجم الدين الفاضل ( ليالى الانس )
الاخ / حمدتو 0الان اسمع صوت غنم الخال الطيوب ( الله يديهو العافيه ) واسمع صوت الفرطاق واشم ريحة اللعوت .اما بالنسبة للخال امحمد ود بابكر ربنا يمتعو بالصحه والعافيه ديل ناس متوكلين وضمايرهم صافيه ومحل ما تمسى ترسى 0 كتر خيركم وفى انتظار المزيد
الليله يا حليلهم المع الصيحه بيفقدو جارهم
الليله يا حليلهم لى ضيف الهجعه بيوقدو نارهم
بت السعوديه / البطحانيه عساكم بخير . ( مع الصيحه ) ماهى وصيحة ماذا ؟
الهجعه ؟ بيوقدو ؟ الفرطاق ؟
خالص تحياتى
فقدابى

ود الدقناوى

ياخى اقيف خلى الكوراك دا 0 ابو القاسم شنو البتناديهو
ياخى صحيناتك ديل والله فى ضروسى ما يحوقن 0 كدى كب اللبن فوق الرقاق دا خلينى انتعشى انا اول حاجه بعدين نادى ناس ابو القاسم وحذيفه وعبدالحى وبوكا
ياخى ديل اكان جوك والله مرتك دى الا تسو ليها تكل عديل يعنى ( طيانه ) بس

بت السعوديه
حمدا لله على السلامه
ما شاء الله 0 شايفك بديتى تدخلى فى الشبكه اقصد الراكوبه واجاباتك كويسه جدا
الفرطاق : شريط من القماش او خيط قطن يربط فى نهاية السوط لاصدار صوت عالى يخيف الاغنام دون الضرر بها 0 لكن الاحوسه بخليها لى حذيفه

يلا اعرفى لينا --تكل --( بضم التاء والكاف )
----- طيانه -----

فقدابى

النحله
مره تانيه وتالته مليون ما شاء الله
هذا من ضمن ما اصبو اليه ربط الناس بتراثهم ولم الشمل واجترار الذكريات واعادة تاريخ بلدنا وجدودنا وحبوباتنا بى طريقه فيها نوع من الظرافه والدعابه وكل واحد يعرف من التانى شوية معلومه فى هذا الشأن
عندى بت اخوى Made in K.S.A اتمنى ان تنضم لهذا المنتدى عشان تتعرف على بعض تراث بلدها
مره اخرى مشكوره بنت السعوديه وابقى يا جوه على التكل

فى انتظار قداحتكم

فقدابى

اها ياجماعة اول شي قولو ماشاء الله على راكوبتنا وطبعا راكوبتنا ماشاء الله وتبارك الله تسع الجماعة كلهم
مشكور يا ود الدقناوى على الدعوة لكن فقدابي دا رابطنا والله ربطة شديدة شكلو كتبنا عند فكى عن الجماعة اياهم
ودعوتك مقبولا و بعد داء كلو وجهز العشاء بس زى مايقول فقدابى اكان عوس لينا في خشمنا
حاجة خفيفة
واحد قال والله من ولدوني بأكل وماشبعت يا الاكل القدامي كمل ولا فتر خشمى
وشكلو المثل شبه بنطبق علينا يا بطحانية ويا ود الدقناوى
ويابت السعودية
طال غيابك والله يالزينين
فحمد الف على السلامة وشكلك زى ما قال فقدابي دخلت الشبكة
نكته
في جماعة من الرباطاب عندهم واحد مرض عليهم حماكم الله وقامو ركبو في البوكس (اليونيت ) وما شين في الشارع وما في زلط والراجل كان لا يتحرك وفي الدقداق الشديد قام الرباطابي المريض اتحرك واحد من الجماعة الراكبين معاه قال امك دخل الشبكة
ولنا عودة

ياود الدقناوي كبر القدح وشوف ليك قرعة لبن ماكنة نحن ماشين عليك
ويافقدابي بعد 15يوم ان شاءالله شاي اللبن اب جمادة انا بشربو مع عمي الطيوب والجبنة
مع بت ابريش واقعدو اتو احرسو البلد دي
وياحزيفة اوعة تطفي النار انا جائي
ويا كاربينو حرام عليك جبنتك خلت الدموع تجري
بت السعودية سجلي في اللستة (الشرقرق)وحلي بعدين
يابوكا نحن دربنا مرق خلاص
ياقاسم قالو واحد ودراشد في سوق التكينة داير ابيع لية نعجة والكاتب طلب منو اجيب لية
شاهد (لانو غير معروف والنظام عندهم في السوق لازم اعرفك واحد عشان بعدين اجيبك لو في نصيبة ) والزبيدي بعرف واحد من ناس التكينة فارش في السوق قال لية اشهد لي
داك قال لية علي بالحرام اكا ن بانيها ساسا خمسة متر ما اشهد ليك خلي هسة شبعتين تقلعن وتمشي

لكم ودي

حـمـدتو كتب:ياود الدقناوي كبر القدح وشوف ليك قرعة لبن ماكنة نحن ماشين عليك
ويافقدابي بعد 15يوم ان شاءالله شاي اللبن اب جمادة انا بشربو مع عمي الطيوب والجبنة
مع بت ابريش واقعدو اتو احرسو البلد دي
وياحزيفة اوعة تطفي النار انا جائي
ويا كاربينو حرام عليك جبنتك خلت الدموع تجري
بت السعودية سجلي في اللستة (الشرقرق)وحلي بعدين
يابوكا نحن دربنا مرق خلاص
لكم ودي

ياحمدتو سافر وبالسلامة انت قائلها ما تنتهي 6 او12
ولما تمش تشرب شاى المغرب مع خالى الطيوب والشاى ابو جمادة خليه يغننو وخلي الخال حمد وحسن يدك نم نمتين وياريت تسجلها ويحكى قصة بت حمد والشعر القالوه فيها وقول لعباس ود عمك محمود جهز المجداع وجهز الكلاب لاننا ماشين للقنيص جنب قوز سعده وكلم عبد الباقى ود الحاج عشان يمش معانا .
اها ياحمدتو بعد يكون باقي ليك يوم يومين صُم خشمك ساى وما تتكلم نحن بعد داك بنوصلك لى المطار وعودا حميد طيبا مستطاب .

والله يا ود الدقناوى صحنينك ديل هن صحن واحد كان من الاول تكب اللبن فى الرقاق
عشان يتبلى الرقاق ونلهطو سريع سريع
نلهطو دى تستحق تمشى منتدى الطب والصحة وتكتب لنا عن مخاطرها
يا حمدتو انت بتشرب شيشة والا شنو إخلو ليك النار موقدة
خايف رقاقك دا يا دقناوى الحق شاى شهر ابريل
كنيش كنيش بندور العيش
الركوبة محتاجة للعيش والدريش
ومحتاجة للتيبار شوال خيش
ومحتاجة للضمنة نومة شيش
ومحتاجة لى مقص لحلق النيش
ومحتاجة للزول البجيب الحشيش
لا شرطة لا جيش
شيخ راكوبتنا على ود ابريش
من غير خربيش
يا ستهم افصحى عن اسمك قبل ما تقرصك نملة ابريش
كان غجر او حناكيش
البدخل الراكوبة امن وبعيش
دا كلام ركيك وكلو دقيش
يا ابوالقاسم
120000 ما بتأكلك عيش