رايكم شنو في الشطحة دي

كوندي ........التطير عيشتا

في احدى مواقع الانترنت وبينما انا اتنقل بين صفحات المواقع صادفني موقع خاص للتقديم بطلبات زواج للراغبين في الزواج من الجنسين
حيث يقوم الراغب في الزواج بادخال بيانته (اسمه وسنه ورقم هاتفه...الخ)
وعلى الفور قمت بادخال بيانتي
في الفورم الخاص بذلك ولم تمضي سوى لحظات حتى رن جرس هاتفي ..وما ان فتحته حتى جاءني صوت انثوي..........
الو........
يامرحبا...منو معاي؟؟
من صوتي دا ماعرفتني؟؟
ابدا والله ماعرفتك..... منو انتي؟؟
انا الموقفة العالم دا كلو على فت كراع......... برضو ماعرفتني؟؟
صدقيني ماعرفتك ...منو يعني...جينفر لويبز..انجلينا جولي ...كرستين هنداوي .....منو في ديل؟؟
قال لوبيز قال.....انا(كوندي).....كوندليزا رايس
منو.......كوكوكواندددددددليييييييييزا راااايس.؟
أي...مالك اتكبكبت كده؟؟
لا معليش....انتي اظنك قاصدة رقم السفارة ......ولا الخارجية ...ولا..........(تمو خيال) معليش الرقم دا مابتاعهم
لا لا انا قاصدة الرقم دا زاتو ...مش الرقم داسوداني .....وبناتك مسجلة في سوداني ..وانا كلها عارفاها...انت قايل CIA بتعمل في شنو يعني؟
لكن انت داايرة بي شنو يااستاذة ؟؟
انا ذي السمعت صوتك دا قبل كدة!!!
لالالا...اكون زول تاني غيري .. الاصوات بتتشابه وكدة!!
لا لا...ايوااااااااااااااااى انت بتاع الحاسوب الجنب السفارة حقتنا ...ياخي انا كايسة ليك من زمان انت والبروف بتاعكم داك القال داير اتزوجني اسمو منو يارب؟؟؟
عبد اللطيف البوني
بس..بس...لكن اسمو مالو كدة...اوع يكون بتاع تكنولوجيا نوويوية؟؟
لا لا ياستاذة نحن ناس مساكين مابتاعين الحاجات دي.!!
كدي خلي الموضوع دا سابق لاوانه.... لكن انت مسجل هنا داير تعرس ولاشنو؟؟؟
لالا انا بهظر ساي ماقايل الشغلانية جد.!!
مافي حاجة اسم بهظر ساي ...سجلت هنا يعني عرس طوالي؟
هي لكن انا داير اقرا يااستاذة؟؟
ماتقرا ...انا قلت ليك ماتقرا؟؟دي اخر سنة وبتنتهي وانا بوفر ليك كافة الاجراءت عشان تاخد الجنسية وبجهز ليك فرصة عمل في(امن المعلومات بتا الكونغرس., غير كدة انا بدرج اسمك في قائمة الارهابين واجيبك اجدع هنا في (غوانتنامو)
كدي خلاص خليني النشاور اهلي؟؟
المهم دا كل العندي قلتو ليك .....تشاور اهلك..تشاور البرلمان...تشاور مجلس الشورى ..دا كلو ماعندي بيهو شغلة
ان بعرف يانعم يا لا!!
وانهت المكالمة بكل بجاحة وتسلطية وفي تلك اللحظات لعنت اليوم الذي حاولت فيه ادراج اسمي في قائمة الراغبين في(الارهاب) اقصد (الزواج) وتذكرت انو......... تنتظرني بفارق الصبر حتى اكمل دراستي ولكن تاتي رياح رايس بم لاتشتهي سفن العبد لله.
ملحوظة:
_هذا الموضوع من وحي الخيال حتى وكتبت هذه الملحوظة حتى لا تضاف البشاقرة الى القائمة المناطق الاوية للارهاب.
_حقوق الطبع محفوظة لدى الرومانسي ولايحق لاي جهة نقل او التعديل في هذا الموضوع.


الرومانسي