من العيدج سلام عروب سلام

احبابى الكرام احييكم على هذا البذل الرائع وارحب بنفسى بينكم لاننى وجدت نفسى واهلى فى هذا المنتدى التحية لكل من بذر بذرة خير ليخرج هذا الطرح الجميل ليزين جيد الشبكة العنكبوتية ويشرح صدورنا ويقر اعيننا سنكون بينكم نبضا والقا وقلما فهل من مرحب على طريقتة الخاصة

ود الدقناوي الثلاثاء ديسمبر 16, 2008 11:50 pm

التحية لك أخونا العيدجابي

لو عارفين أنك بتجينا كنا فرشنا ليك الطريق ورود من العيدج الى البشاقرة ، مرحب بيك الدار دارك ونحن ابناء منطقة واحدة والعلاقة بين البشاقرة والعيدج علاقة حميمة وطيبة ابقى داخل لجوه ، حبابك الف .

شكرا جميلا ود الدفناوى على ترحيبك الحار والورد ازدانت به صفحات النت بمقدم منتدى يلبى اشواق اهل المنطقة

مصعب معطى الأربعاء ديسمبر 17, 2008 1:23 am

غايتو يالعيدجابى زى مقال ودالقناوى مرحب بييييك وابقى داخل لى جوه .
ناس العيدج ديل طبعا الواحد مابعرفهم الا لما يحتكه بيهم خاصة فى معسكرات الخدمة الوطنية وفى الجامعات كمان , فالعيدجاب هم اهل الكرم والشهامة .
واحيهم من هنا فردا فردا خاصة ,الريح ,ود المقابلى,وترة ,السيد,بلية وياريت نشوفهم اعضاء معانا.

الفاتح الطيب الأربعاء ديسمبر 17, 2008 3:21 am

ياسلام على الالفة الجميلة بينا وبين ناس العيدج الطيبين احترمهم جداً واحتفل دائماً بحبهم للبشاقرة واكن لهم خالص التقدير وربطتنا بيهم علاقات الزمالة زى ماقال مصعب فى المعسكر والجامعة ولقيناهم نعم الاخوان والزملاء ومافى داعى لذكر الاسماء ويامصعب ماتقصر من الزيارات ونقل التحيات الحارة والقصة ماقصة صحبة وبس الناس ديل اهلنا والما عارف يسأل الطالباب

الحبايب مصعب والفاتح ما خجلوتنا عديل كده والله الواحد قرب يخش براسو عديل كده لى موده خاصة لاهلى ناس البشاقرة ولى علاقات موده ودم كذلك خاصة عمنا احمد ودالعبيد والطيب الطاهر وزملائى فى حقل الاعلام المرئى العبيد ودريا والزميل مامون والكثيرون الذين لا استطيع احصائهم جمعتنى بكبارهم جلسات الوالد البرلمانى واول مرشح للمنطقة فى برلمان 67وبصغارهم وشبابهم ميادين كرة القدم ابان فترة الرياضة ايام كنا نذهب للكورة من العيدج برجولنا لنستمتع باروع العروض وذكريات ثرة ناتى لها فى حينها شكرا لمروركم الانيق وترحيبكم الجميل

حسب الرسول مبارك الأربعاء ديسمبر 17, 2008 7:22 am

مرحب بيك وحباب الف يالعيدجاوي ياريت اللاسم بالكامل نتعرف اكثر والعيدج كلها حقتنا وبالاخص الحداداب والطالباب

حسب الرسول اخوى كيفنك ومشكور على مرورك
الاسم شريف محمد الحسن الفكى ادريس
البلد العيدج
متزوج من امدرمانية ولى من الابناء محمد ومرام اللى شايفهم فى الصورة
العمل اعلامى (منتج برامج بالتلفزيون القومى ) تحديدا منتج فريق التنفيذ على الهواء ببرنامج البيت السعيد
رفاعى مسلمى ابوى رئيس محكمة العيدج
كفاية ولا ازيد
على العموم جاهز لاى سؤال

حسب الرسول مبارك الأربعاء ديسمبر 17, 2008 8:30 am

حبابك يا ابن عمي من الوالد وصلت وخاصه المحاكم اكل عيشنا ومرحبا بك في دارك

ومن العشيرة كلها نحن لا يفرق بيننا اى شئ عائلة واسرة واهل من الجهتين منذ كنا نحلق فى سوق ودراوة عند سعد الحلاق من البشاقرة ومسئولين من الخير هل هو موجود وماذا فعلت به الاقدار وبشنطتة السوداء الصغيرة

Admin الأربعاء ديسمبر 17, 2008 5:59 pm

الاخ العزيز شريف شكرا علي المشاركة الفاعلة التي حركت اركان المنتدي وهي من زول معروف وعزيز علينا وانا اعتبر هذه المشاركات دافعا قويل للمنتدي اما مشاركتك انت ففيكفي انك شريف محمد الحسن ابن العيدج الغيور

ومن هنا احييك واقول لك مرحبا بك في منتدي البشاقرة صاحب دار وليس ضيفا

ومزيد من المساهمات

العبيد ودريا

يا ود ريا شوية شوية عليا شكرا جميلا لك ولكل من اسهم فى جعل هذا الطرح بيننا انتم سواعد الامة التى يرتكز عليها الجيل القادم وستجدنى باذن الله رهن الاشارة وكفاية راكوبة ظليلة يتفيا ظلالها كل اهل الشرق ويقيلون تحت ظلها من حر وهج الشمس وكرب الدهر

مصعب معطى الخميس ديسمبر 18, 2008 12:05 am

ياشريف والله سخنت لينا المنتدى دا شوية
يارب يظهر كاربينو المختفى ليهو كم يوم Very Happy

شكرا يا مصعب وكاربينو دا منو (كاربينو كوانين) ولا شنو ياخوى ابعدنا من الغابة دى خلينا فى طراوة البحر

فقدابى الخميس ديسمبر 18, 2008 3:02 am

هكذا نحب ان يكون منتدى البشاقرة يجمع الاهل والاصحاب والاحباب ( من كل بستان زهرة )
الف مرحبا بك اخى العيدجابى وبى كل ناس العيدج وشرفتنا ونورت المنتدى
فقدابى

العزيز فقدابى شكرا لكرمكم الفياض واستقبالكم الجميل وحفاوة اللقيا ووصل المقطوع مشكورين كلكم

الدنقلاوي السبت ديسمبر 20, 2008 7:48 am

مرحب حباب العداجة حباب ناس شرق الله البارد , لك التحية السيد شريف محمد الحسن وانت بين اهلك واحبابك والكل يعرف والدك محمد الحسن وكفى ونتمنى لك التوفيق والسداد وربنا يحفظ الامير والامورة .
جعفر بخيت محمد نور

فقدابى انتم زهور المنتدى ونوارتها تشرفت بكم اكثر وترحيبكم اثلج صدرى وشرح خاطرى امنياتى لكم بالتوفيق

عبدالحى الضو الأحد ديسمبر 21, 2008 2:14 pm

الاف الترحاب يا ود العيدج معليش جات متاخرة شوية لكن تقول شنو
تانى مرحب بيك
الطيب محمد الحسن اخوك والا اسم على اسم اصلو دفعتنا ومن العيدج كمان

الاعزاء فقدابى وعبد الحى شكرا لترحيبكم ومروركم على االبوست طوقتم عنقى باندر اللالى واعذب الكلمات وكل العيدج على لسانى بتعزف ليكم اهزوجة الطرب الجميل ويا ود الضو اسمو الطيب احمد الحسن وهو بن عم وخالة وكانو اخى من امى وابى شكرا ليكم مره اخرى ويا ريت نشوف فطاحلة البشاقرة على هذا المنتدى اتمنى فى مرورى القادم ان ارى بصمات مامون عثمان والعبيد الطيب واولاد احمد ود العبيد ويا جعفر اظنك اخو ناس بخيت ود محمد نور وشقيقوا الكان عندو دكان فى سوق العيدج واصلهم تجار مش كده

am شكرا لرسالتك وردك الذى لم اقراه

من العيدج سلام عروب سلام

من العيدج سلام عروب سلام

رد: من العيدج سلام عروب سلام

رد: من العيدج سلام عروب سلام

رد: من العيدج سلام عروب سلام

رد: من العيدج سلام عروب سلام

رد: من العيدج سلام عروب سلام

رد: من العيدج سلام عروب سلام

رد: من العيدج سلام عروب سلام

رد: من العيدج سلام عروب سلام

رد: من العيدج سلام عروب سلام

رد: من العيدج سلام عروب سلام

رد: من العيدج سلام عروب سلام

رد: من العيدج سلام عروب سلام

رد: من العيدج سلام عروب سلام

رد: من العيدج سلام عروب سلام

رد: من العيدج سلام عروب سلام

رد : من العيدج سلام عروب سلام

رد: من العيدج سلام عروب سلام

رد: من العيدج سلام عروب سلام

رد: من العيدج سلام عروب سلام

رد: من العيدج سلام عروب سلام

الإثنين	الثلاثاء	الأربعاء	الخميس	الجمعة	السبت	الأحد
		1	2	3	4	5
6	7	8	9	10	11	12
13	14	15	16	17	18	19
20	21	22	23	24	25	26
27	28	29	30	31