الشعر الحلمنيشى

يعتبر الشعر الحلمنيشى من ابواب الشعر المتميز فهو يجمع بين مقدرة الطرفة - النكتة - على انتزاع الضحكة من مفارقات الموقف ومقدرة الشعر الرمزى على التجول فى مساحات الممنوع دون الدخول فى المواجهات المكشوفة .... ولما كنت اعلم ان العديد من ابناء الحلة لديهم ارشيف معتبر من القصائد الحلمنتيشية بل ان البعض منهم لديه محاولات جميلة لذا اود ان افتح الباب هنا لكل من يستمتع بهذا الضرب من فنون الشعر ان يشاركنا بما لديه ان كان منقولا او من ابداعته الشخصية
وضربة البداية قصيدة لواحد مشوكش حب بت الناس وفعد يتجرجر لمن خطبوها

والله موضوع الحلمنتيش جميل بالحيل تسلم يا ود عثمان
اها دحين نشارك معاكم بقصيدة عن وداللمين الجهجه البنوت زى خاتم ود البادية

مشكور كربوش على المرور وعلى القصيدة الجميلة لكن بينى وبينك زمن فطين بت الحسن ود اللمين دا كان بيغنى نرجوا ان تواصل ابداعاتك

دايرين نشاركم بشعربلوغ الغايات في هجاء الكليات
الصيدله :
الصيدلى الحرس الدوا
يديك فتايلو بلا سبب
النوع دالاذم تشربى
وعند اللزوم داك ابلعي
وكان ما نفع تب اجدعي
المهم بس تدفعى

وغا نعدكم بالمزيد

والله يا ابازر ود اللمين دا بيغنى من زمن جدى حى وابوى صبى اكيد زمن ناس الفطين بت الحسن اكان بيغنى

مشكور عمر على المقطع
لكن مالقيت غير الصيادلة .... كان تبدا بناس البيطرة - تطير عيشتم - اصلهم حاتلين بين الطير والحمير او كما تغنى عقد الجلاد .... بس ناس الصيدلة
ناس كمو كطو
وكطو كمو
و الجماعة الكل يوم
قاعد استحموا
والعطر خمسيـــــــــن متــــر
حـــرّم تشمو
نرجو ان تواصل

سيد/ بـِشْبِشْ
البروفسير / جاغوم بن بلاع

سـيد بـِشْـبـِشْ .... سـيد بـِشْـبـِشْ
عامل حازم وسيفـُو بيـرقـِش
أمـرو بيـمشي
وكـفـُو بـِيَطـْرِشْ
وعيـنـُو الحاره في يوم مابـْـتـَرْمـِشْ
-------------
عند المكتب .. رسمي بيغضب
جوه البيت... يرفـِسْ ويضرب
وسط اصحابـُو .. يرقص ويلعب
وراجل نكته .. وصاحب مقلب
وآخر الليل .. يقابـِض ويهْـبـِشْ !!
-------------
سـيد بـِشْـبـِشْ
راجل دين .. وراجــل دولــه
صاحب سطوه .. وصاحب خطوه
وصاحب صـوله .
وبيني وبينكم ...
سـيد بـِشْـبـِشْ واعي .. وفاهم .. فاهم .. فاهم ..
وعارف إنـُّو الواحد ... وبرضُو .. ويعني ... ولازم
وبالمفـــتوح ..
سـيد بـِشْـبـِشْ - كلام سر مافيش واحد يمشي يسـَمِّعْ – راجل دُغـْـري
لاكين في الليل هجـيجُـو يولـِّعْ
وزي ما تقول بحب المنقه والحاجات الـ Nice ولظلظ !
وقبل ما ندخل Deep and deep
أحسن نعرف صورة بـِشْـبـِشْ
أصلعْ .. وَشـُّـو بيلمع .. باديه عليهـُو علامْة َ النعمه
عالي .. ومـِكرِّشْ .. وعرجه خفيفه في حادث حركه
شكل سيادتو عـُموماً مدهش
ودايماً يحمل سبحه تسبح وحدها دون تسبيح ..
أتوماتيك .... حكمة ربك ونعمه صحيح ..!
سـيد بـِشْـبـِشْ راجل
Arrogant.. rich.. Intelligent. Smooth and elegant
But some times appears weak and slightly hesitant
وفي عصريه وكانت جـُمعه
سـيد بـِشْـبـِشْ حكحك دِقـْنـُو
هذب شنبو
وِشـُو بينضح نـُضْره ولمعه
خـتَّ عـِبايتو
طقَّ عصايتو
خبط الباب من خـَلفـُو بـْرَزعه
خل البيت يتراجف كلو
حاجه نفيسه .. بناتا تلاته ..
وبالاولاد يكمـِّـلـُو سبعه
وفي المرسيدس البلمع اخد القعده
كدوسو البـُنـِّي تهبهب نارو
مدَّ صباعـو .. هـزَّ دماغـُو
يعني سيادتـُو بحـَيِّي في جارُو
وعاد ( البنز) قال ياليل !
وسط الشارع يلوي غـُبارُو
واثـناء ما سايق وماشي في سكه ..
كان بيدندن .. يعني بيمدح ! :
تِـشـْـكَ تِـشـْكا .. تِـشـْكا ...
أوو تـِشـْكا ..
واثـناء ما سايق ويعني بيمدح ..
عينو الزايغه بـْـتجمع وتطرح
وهناك علي زاويه لمح المنقه
وسـيد بـِشْـبـِشْ تمساح لو يلمح
قلبو ينطط جـُوَّه ضلوعـو ..
يطق الروري ..
يسكـِّل ويردَحْ
ولفَّ ودوَّرْ حول المنقه
ودوَّرْ ولفَّ
رسم الزاويه وكشف المسرح
وبسْمه أنيقه صناعة برَّه
بسمه تعـلـِّبْ .. تعـلـِّبْ حِكـْمه وخِبره !
( ما نتفاهم يا خلـْق الله ..! )
وعاد خلـْق الله ما فاهمه ! وناس واعيين !
وعارفين الحال والأمر الواقع
وإشاره خفيفه وغــمزة عــين
كان الرد الفـرَّح بـِشْـبـِشْ
وخـلَّ سيادتو يهدِّي .. يهدِّي يمين
وجات المنقه الشيك تتمخطر
- مساء الخير آنسه ......
- مرمر
- اسمك روعه .. جسمك روعه .. بهجه و سُكـَّرْ !
أما سيادتو : سـيد بـِشْـبـِشْ
- رائِعْ .. مُدهش .. إسمك مُـنعش .. موسيقي ومُطرب ..
بس خازوق الناس تـتـلخبط
ومره تقول لسيادتك : شـِبـْشـِبْ !
- أه يابتْ يا نـُكته ! ... صِنفك مُتـْعـِبْ !
وهناك في شارع كم مُش عارف !
والبيت الناصيه .. أشجار وزخارف
عربات تـتلامع .. لمبات ورفـارف
كانت هيصه (ورَبـَّه ) تـوَلـْوِلْ
ناس بتصفق .. وناس بتـزغـرت
وناس بتهلـِّـل
وناس بتـنادي شيلي وخـُتـِّي
وناس بتغازل اموت يا إتــِّي
وناس منبسطه غاسله وكاويه
وناس ركانـِي بتعـزف زاويه
وناس بتغني حِنـِّي يا تـِتــِّي ...!
وسـيد بـِشْـبـِشْ أمــير الموقف وبـطل الساعــه
كان مشغول مع ناس (مرمر) بـِصَلي جماعه
ولما تم َّ صلاتــُو وسلم ..
قام يسلم بالاحضان
قال مشتاق وكاتـلو الشوق في الحِبـَّان
وزي ما قلنا قبيل
لمَّنْ بـِشْـبـِشْ راجل بهجه وجـَدْ فنان ..
جدع العـِمَّه هناك وعصايتو
ولحـَّـق جـزمتو بالقفطان
وهاك يا .... Dance!
ودارت حلقه عجاج وغبار
وناس بـِتـْسَـوِّي الرَّدحِي الجَـدْ
وناس في الرَّدَحِي رقيصا هظار
وناس انبسطت فوق الحد
وناس بتدُق كاروشا وظار
وناس بتقول يا (رفاعي ) مـَدَدْ !
ونس انبطحت ..
وناس انبرشت ..
وناس انطرحت ..
وناس انكمشت شان تـنمدْ
وفجأه في لحظه .. حصلت كبـْسه
وزي ما تقول البيت اتــْهـَدَّ
الجو اتلغـَّم .. وفار واتسمم
ووصل الكومر شكلو يخـَوِّفْ
نزل ام باشي معاهو الاورطه
وعملت سَـــدْ
وجاط الموقف
وسـيد بـِشْـبـِشْ ضرب اللخمه
ربط الساعه مكان الجـــــزمه
ولبس الجزمه وقال دي العمه
ولف العمه محل الساعه
جبد قفطانـو رمي الشماعه
وحاول انط من فوق ..
تلـَّبْ تووف جـُوَّه البلاعه
وجـُوه الكومر وبالبوليس الناس شحنوها
البتباكا .. البتوقع .. البتعذر ..
البتشفع .. اب ضحكات باهته وبتشجع
وناس تـتونس .. وناس تـتجرَّس ..
وناس بـِتـْحَـنـِّس شان يعفوها ...
وفي وسط الكومر قاعد سـيد بـِشْـبـِشْ
ماسك سبحه ..
مره يسبـِّحْ .. ومره يقحـْقـِحْ .. ومرَّه يسب
قاعد افـكـِّر ..
مشغول باولادو وحاجـَّه نفيسه
وناس المكتب
وكيف القصه هناك بـِحْكـُوها
وكل ما (مرمر) تبسم ليهو .
يسب للمنقه ويوم زرعـُــوها !