الطريق الى البشاتقرة

الحافلة مليانة عفش... السخانة مبالغة .. يصعب معهاتناول كباية شاي او حتى سيجارة (برنجى) تتأخر الحافلة كالعادة فى الانطلاق .. تنتظر (الناس الحاجزين ودخلو السوق) يتذمر الطلاب الجامعيين بينما ترتفع اصوات (نغمات الموبايلات) فى المقاعد الخلفية تحاول جاهدا ان تتاقلم على الحر والخروج من الواقع بتصفح الجرايد المتدلية بين ارجلك فى (بهدلة) ظاهرة.. تنتقل من عنوان الى آخر ولكن دون جدوى...
تنزل من (الحافلة )لدقائق لتعود وتكتشف انه لم يتغير شئ ... تتذمر وتمتم فيسبقك (ود الشامى) بكلمات شاعرية سراعان ما تجبرك على الابتسامة ... بينما (عباس ايوب) يلقى عليك اطيب سلام تسمعه فى حياتك...
(تخارج )نفسك من الاحراج باللجو لاقرب (كشك) او (محل مرطبات) لتتناول (العرديب) البارد ... وما ان تفرغ ما ى الكوب فى جوفك حتى تشعر بيد باردة على كتفك تكتشف انه (محمد صديق) ويقطع دهشتك وهو يذهب بعيدا :
اسمع ما تديهو ... دفعنا ليه حق العصير...
يازول والله ما بجى الكلا......زز
_ خلاص ياخى فكة زاتو ما عندى, هكذا يقاطعك (بتاع العصير)
تدخل العشر الاف فى جيبك بينما ترردد فى سرك:
ولد ضضكران والله
ترجع الى الحافلة فتكتشف ان عمك (التوم) قد جلس على مقعدك وعلى يساره تجلس الحاجة صفية زوجته...
تبتسم وتحاول ان تدارى حيرتك خلف تحيتك لهم..
وتتفاجئ بالبنت التى تجلس فى المقع الرابع ...
(جنس عيون) ماتشاء الله .. دى لكن تكون بت منو دى والله.. بتشبه ناس (عمار سعيد) .. معقولة تكون اختو
تنتبه للبائع المتجول الذى يشد قميصك من النافذة..
مناديل ...ليمون ...مصلايات... لبن علب..
__ ده شنو مغلق والله دكان ولاجزارة انت؟
هكذا تساءله فى استغراب
للتكتشف انه يبيع .. عصير وطعمية وحبر طابعة وملاعق وظهرة..
يالله يا ولد احسن ليك تمش من هنا انا لونزلت عليك بتعبيك...
ويذهب دون ان يهتم بكلماتك للنافذة الاخرى .. نحو (برى) مباشرة..
يداعبك (احمد حلاوتو) :
معاك اللواء (شتل ) احمد حلاوتو .... كووووووة
والريح حلاته .. يبتسم وامنة الدلالية تجبره على القيام لها من المقعد الامامى
وبعض الشباب لا تعرفهم يقهقهون بصوت عالى اعجابا بقفشات (شروط)
اكياس الخضار وجوالات الاسمنت والسراميك تملاء ارضية (الروزة) او الحافلة... تخرج كيس التمباك... والجريدة والجوال وبعض الاوراق الرسمية وصور بابورت جديدة وكيس تسالى وتضع النظارة فى جيب القميص وتدخل باقى الفكة فى جيب البنطال
وتتمنى ان تصل البشاقرة
والبقية غداً انشاء الله

من جد سرد ممتاز جدا ونشكرك عليهو واسال الله لك التوفيق 000000ومنتظرين نحن لسه فى الخرطوم

لك التحية اخي الفاتح وانت تناقش مشكلة بهذا الاسلوب الرائع والجميل والسرد المرتب
والطريق امامك كبير
والله يوفقك

مبرووك يالفاتح علي هذا السرد الروائي ومزيدا من التقدم

يا ود
الدقناوي خليهو قلم حقيقي ما صوره وتوعدنا وتبخل بي صوره لكن ما قلم ذهب؟