رثاء في الرائع دوما

هاكم هذه الرثاء في الرائع مصطفى سيد احمد والذي كتبه الشاعر المرهف سيد احمد الحاردلو:

واحد جميل
رثاء مصطفي سيد احمد


- 1 -

تانى قام واحد جميل فى بلدنا ... ماتْ

وكان بغنى للمساكين .. والمسولتين .. والحفاتْ

وكان بغنى للمنافى .. والعصافير .. والرعاتْ

وكان بغنى لى بلد فى الحلم ... جاي .. أغنياتْ

وكان بطنبر .. وكان بدوبى .. للحياةْ

- 2 -

تانى قام واحد ملك ... روّح .. وفاتْ

وكان ملك فى الريد ... وإنسان فى الصفاتْ

وكان مهاجر فى دموع كل البكاتْ

وكان وتر مشدود ... ومسكون دندناتْ

وكان - عليه سلام - تقول مازول حياةْ

- 3 -

يا مصطفى .....

فاكر الجماعة الكانوا ساكنّك دوام

من منفى لى منفى

ومن عود ... لى سفرْ

فاكر العصافير المسافرات دون جواز

فاكر اللى داجّين فى المطرْ

.... عبدالرحيم ... وهلم جرْ

فاكر القطر

فاكر النخيل .. فاكر الحراز

... الليلة كانوا جميع هناك

قسماً يمين .. كان الجميع باكين عليك

كان المطار فارش عليك

كان الجميع مشتاق إليك

ياسلام عليك

لمّان تكون زولاً عزيزْ

عنْ ناس عزازْ

- 4 -

يعنى كان لازم تفوتْ

والحزن مشرور فى البيوتْ

والدنيا مازال فيها حوتْ

.... وفيها لسع .. عنكبوتْ !!

.... يعنى كان لازم تفوتْ

وتخلّى أوتارك سكوتْ

ولسة عندنا ريد جديدْ

ولسة عندنا ليك قصيدْ

...... يعنى كان لازم تفوتْ

وتخلى هذا الحب يموتْ !

- 5 -

ياسلام عليك

لمّان تكون زولاً عزيزْ

عنْ ناس عزازْ

يا سلام عليكْ

فوق

الرومانسي كتب:هاكم هذه الرثاء في الرائع مصطفى سيد احمد والذي كتبه الشاعر المرهف سيد احمد الحاردلو:

واحد جميل
رثاء مصطفي سيد احمد

يا سلام عليكْ

الاخ العزيز /رومانسى
لك التحية وانت تحذو حذونا بتناول كل شى يخص الراحل المقيم /مصطفى سيد احمد
ولكن اخى اهمس فى أذنك ان يكون كتابة كل شى يخص مصطفى سيد احمد فى البست الفاتح لهذا الموضوع لكى نوثق له 0 ونطلب منكم المساعدة وهمتكم معانا 0 مع مرعات عدم التكرار ولك كل الشكر والتقدير 00 ونكرر عدم التكرار
عزرا اخى واستميحك فى نقل هذا الرثاء الى البست المزكور

شكرا يا سهاري على هذه الملاحظة وفي الحقيقة انا اردت ان اضفيه الى البوست الخاص بمصطفى سيد احمد لكن جاءت اضافته في هذا البوست عن طريق الخطا فنرجو من الاخ المشرف تحويله الى البوست الخاص بمصطفى سيد احمد او اعطائي صلاحية التحويل وانا ساقوم بتحويله.