فريق حي العرب (السوكارتا)في بنغازي

نعلم انه قد لايكون من بين الاعضاء مشجع لنادي حي العرب ولكن لانه يمثل السودان وكذلك
لتحقيق سبق صحفي بالمعلومات لمنتدي البشاقرة نورد هذا الموضوع بحكم تواجدنا في بنغازي
حيث استقلبت مدينة بنغازي مساء امس عند الساعة السابعة مساء بعثة نادي حي العرب بورتسودان
القادم لاداء مبارة الرد امام اهلي بنغازي في بطولة الكونفدرالية (كاس الاتحاد الافريقي)
وستقام المبارة بالمدينة الرياضية ببنغازي يوم الاحد 15 /2/2009 وجدت البعثة في استقبالها ترحيب حافل من القنصلية وجموع الجالية السودانية بالمنطقة الشرقيةونزلت البعثة بالمدينة السياحية (وهي 3 نجوم) وتطل علي البحر الابيض مما يجعلها في هذه الايام غير مناسبة لاقامة البعثة نظراً للبرودة الشديدة وطالب رئيس البعثة بتغيير مكان الاقامة وغالباً سيتم تحويل البعثة الي فندق الواحات (3 نجوم )وسط المدينة وللعلم فان ادارة الاهلي مازالت تتحدث عما وجدته في بورتسودان حيث تمت إستضافتهم في هيلتون البحر الاحمر(5 نجوم) ومن هنا يحق لحي العرب مطالبة الاهلي بالمعاملة بالمثل حسب الاعراف الرياضية
هذا بالاضافة الي ان بعثة حي العرب تعرضت للتوقف بمطار طرابلس لعدة ساعات
تجدر الاشارة الي ان مشجعي ا هلي بنغازي معروف علي انه هم اشرس جمهور غالبين او مغلوبين
و نظرا لنتيجة الذهاب التي انتهت لصالح اهلي بنغازي بهدف دون مقابل احرزه(ولدنا)افياني
تصبح حظوظ العرب ضعيفة في التاهل للدور القادم.
نسأل الله ان ينصر حي العرب ممثل السودان في الكونفدرالية
تخريمة :
ياايها الوصيفاب(حذيفة وكاربينو) مش كان اخير ليكم كونفدراليتكم دي بدل الجهجة
الانتو فيها الان شئ تكاسة وشئ نسوان؟ .
وللحديث بقية

غايتو يابوكا تب ما تقصرو معاهو

يا بوكا مواعيد الدوام انتهت لكن بنرجع ليك يوم الاحد كان المولي هون

يا بوكا هسة انت قلت شجعو فريق حى العرب نشجعو كيف وانت بتكرة المريخ ما طالبين منك ان تشجع معنا
وبنغلب فى كيجالى
الله انصر الهلال اى الهلال يا بوكا يعنى ما غلطان
اخير النسوان من حكم السودان

نتمنى من الله ان يوفق فريق حى العرب فى مباراته المقبلة ,ورغم صعوبة المبارة الى ان الامل موجود فى فتية السوكرتا,واذا قدر الله وخرج الفريق سوف تكون التجربة خير معين فى المرات القادمات.
عندى احساس انو (ولدنابركة عباس) عندو قوون فى المبارة.
كرشوم مادام موجود مافى خوف على الفريق.
ياعبد الحى اذا كان افيانى(الماسورة) بتفتكرو ولدكم طيب خارجتوه لاشنو .
اذا كان بتسمو المريخ الوصيفاب انتو (المنسحباب ).
فى بداية كل موسم انسحاب ,فى نص الموسم انسحاب فى البطولة العربية انسحاب .
اولادكم حالفين عليكم .
كرنقو يهدد شباك المعــذ من بنغازى .
وعلاء جبريل من عطبرة قال حالف الى يوريكم بعد العمرالطويل دا كلو خدمــة تخارجوه بالطريقة دى.
جيمى مانديلا امبارح جاب قونين فى المبارة الودية .
والموردة اخر استعدادات احسن ليكم اسمعو كلام على احمد وانسحبو طوالى.

ما شاء الله ياكاربينو المريخاب زادو
لكن يامحمد صلاح مابالغت عديل كدة عيدجابى ومريخابى

انتهت قبل قليل مبارة السوكارتا مع اهلي بنغازي لعب العرب بتنظيم4-4-2 وادي شوط اول علي اروع مايكون وحبس انفاس جمهور الاهلي الشرسواجبر الاهلي علي احترامه وسيطر العرب علي هذا الشوط لعباً وتنظيماً ومن كرةمرتدة من دفاع الاهلي احرز (حمادة) احمد مارتن هدف المبارة الوحيد في الربع الاخيرمن الشوط الاول وفي الشوط الثاني تراجع اداء السوكارتا لعامل اللياقة والجهد الزايد في الشوط الاول وبالمقابل كثف الاهلي من ضغطه علي العرب و كان شلبي حارس العرب بالمرصاد لكل الهجمات ,اجري العرب تغييرقضي بخروج المهاجم المزعج (مقدم) ودخول المحترف باتريك الذي لم يوفق وتعرض للطرد في الربع الاخير من اللقاء مما زاد الضغط كثيراً علي العرب المتراجع اصلاً حتي اعلن الحكم عن انتهاء اللقاء بفوز العرب بهدف دون رد ليحتكم الفريقان لركلات الترجيح حيث اهدر العرب جميع الركلات ماعدا كرشوم بينما نجح الاهلي في تسجيل 4 ركلات وبالتالي خسر السوكارتا 1-4 ليودع العرب بطولة الكونفدرالية
تحــــــليــــــــــــــل:
دخل حي العرب المبارة والكل يتوقع له خروج مذل من واقع لقاء الذهاب الذي خسره بملعبه (اظنكم تابعتم الحديث المحبط لاحد المدربين في عالم الرياضة بالتلفزيون) .نظراً لنتيجة الذهاب بالاضافة الي الظروف الطبيعية (برد شديد وامطار غزيرة ) قدم حي العرب في اولي مشاركاته منذ عهد بعيد نموذجاً في التمسك بالامل والصمود حتي اخر لحظة ويمكن ان نقول ان السوكارتا خرج بشرف كونه انتصر في زمن المبارة الرسمي ووعاندتهم ركلات الجظ بينما ابتسمت لصاحب الارض والجمهور. كان ابرز لاعبي حي العرب الحارس (شلبي )والمهاجم(كرشوم) الذي لعب بمستوي اذهل الجميع واطرب الجالية السودانية. لم بوفق مدرب حي العرب احمد ساري في شوط المدربين (الثاني) وكان يمكنه كسب المبارة بسهولة باكثر من هدف لو اعتمد علي الانضباط التكتيكي وعدم التراجع والخندقة كما انه لم يستفد من تراجع مستوي الاهلي وفقدانه في هذه المبارة لعدد من لاعبيه الاساسين هذا بالاضافة الي تبيدلاته غير الموفقة خصوصاً خروج (مقدم) ودخول النيجيري باتريك.اكثر مااعجب الجالية السودانية صد (شلبي) لركلة الترجيح الاولي للاهلي التي نفذها (ولدنا سابقاً )افياني. كان بامكان العرب الصعود عبر محطة بنغازي لكن كان للاسباب التي ذكرناها مضافاً اليها ضعف الخبرة اللاعبين الاثر الواضح في هذه المحصلة ونتمني لحي العرب ان يكون قد استفاد من هذه التجربة بصورة عامة.
تخريمة:
لاننسي ان نبارك للوصيفاب الصعود من شباك التاكسي في اخر لحظة من اخر محطة مقطعية (كيجالي)لكن المشكلة اتخلصتو من التاكسي وقعتو في( طيران الاتحاد ) من تاكسي لي طيران غايتو نقول التاكسي اصلا بوصلك للمطار فقط مابطير بيك,وكمان برضو جايين لييبا الله يستر و المرقكم من كيجالي يمرقكم من طرابلس خصوصاً كدا يادوب نقدر نقول (الكتوف اتلاحقت) ونحذركم من الاتحاد الليبي لانه صاحب خبرة كبيرة في بطولة الابطال ونرجع ونقول يارب تنصر اخوانا الوصيفاب حباً في الوطن

يا بوكا فسرت وما قصرت
بينى وبينك يا بوكا بتقيف معانا فى ليبيا

اولا نحي اولاد السوكرتا للخروج بشرف وكلمة شرف دي حقو اخوانا الانسحاباب يقيفو عندها شوية لانو لو في اي كورة الفريق البتغلب فيها ويفقد الامل في الصعود وينسحب مااظن في دورة تكتمل.
والمشكلة هسي بقت في البروح العجاجة الرابطة من يوم جريكم لي هسي لانها سببت للناس مشاكل صحية كبيرة وبالزات ناس الحساسية والربو الجيوب الانفية وكدي.
ثم نبارك للزعيم ونقول الله ادانا الفئ مرادنا .
ويا شمات تكسيكم اتشلح مات.
ويابوكا فعلا التاكسي بوصل الزول المطار ومن طيران الاتحاد ولي قدام المسيرة متواصلة انشاء الله مش لوسجلو داودا كاميلو ولاسانا عبد الكريم برضو طايرين .
لكن انتو يالله ليكم من ناس جزير رينون.
اسبورتيف شغلو نضيف.

اول ما لفت انتباهى وانا ادخل البقالة المجاوزة لنا فى الحى صوت المعلق الرياضى وهو يزكر اسامى بعض لعيبة حى العرب وبعض المدن الليبية ... ادركت على الفور انها هى المباراة المعنية ثم حملتنى الافكار مباشرة الى العزيز بخارى وبدأت اجتر بعض ذكرياته وكلماته فى هذا المنتدى ...فجاءة اخرجنى صوت المعلق من افكارى بقوله : تشهد المباراة تمثيل ديبلوماس كبير ثم عدد بعض الاسماء بينهم اخونا بخارى ... يالها من من مصادفة او لنقل اقدار تتذكر انسان فتسمع اسمه على الراديو كل ذلك حدث فى ثوانى قليلة فلك التحية ايها الرائع بوكا

الاحباب سلام
ونقول
لـ كاربينو بنقيف معاكم لانكم قد تواجهون محنة حقيقية بعدين الوقوف عندنا انواع
مرات عمل رسمي ومرات بدافع الحب زي ناس السوكارتا لمن لن نفجر في الخصومة
ونتمني تجاوزكم لعقبة طرابلس
يــاقرش: عليك الله ماخجلانين ؟ البشوف فرحتكم يقول وصلتوا دوري المجموعات
والله دايرنكم تمشوا لقدام عشان تعرفوا قدر الهلال حقاً
الفاتـــــــــــــح الحبيب الاديب :الأرواح جنود مجندة ما تعارف منها ائتلف .
هذا هو التخاطر

يابوكا دا مسلسل معروف بدا ودي الحلقة الاولي.
حنالقي الاتحاد الليبي وحتقولو مافي ليكم طريقة لدوري المجموعات.
حنقش دوري المجموعات وحتقولو مافي ليكم طريقة لدوري التمانية.
حنقش دوري التمانية وحتقولو مافي ليكم طريقة لدوري الاربعة.
حنقش دوري الاربعة وحتقولو مافي ليكم طريقة للفاينال.
حنلعب الفاينال حتقولو لينا مافي طريقة للكاس.
لحدي مانجيبو ليكم في العرضة جنوب وتاني عينكم ماتشوف الا النور.
لكن احسن حاجة اليومين مابجيبو سيرة الحمام الميت تاني.

الكاسات شفناها وشلناها وماغريبة علينا.
لكن انتو ليكم قريب ال80 سنة والمحصلة صفر.

كاسات المجاعة الفلقتونا بيها دى
قولو كلام يخش العقل
شلتوها من سنة حفرو البحر
من زمن الناس كانت بتعتبر الكورة دى شغلة فارغة ومقدودة
بيضة الديك الليها كم وخمسين سنة دى عملتو لينا بيها وجع وش
قلتو شلتوها زماااااااااااااان
يعنى مادايرين تانى !!!!
عجبى!!!

الكلام دا كلو خلي لكن يوم 27 كيف.
مع السلامة وبظهر عليك بكرة انشاء الله.

جيت في وعدي لكن اوعدك بانني ساوقف المداعبات والمناكفات والعكننة الي اجل.
لانها لمن تكتر بتبقي بايخة.