الاكياس تشوه منظر البشاقرة (صور)

واجهة البشاقرة صارت ملجأ ومخزن للاكياس الطائشة وهي قد شوهت منظر البشاقرة الخارجي بشكل كبير فالى متى نقضي على هذه الاكياس والتي اثبتت الدراسات انها سبب كثير من الامراض الخطرة

هذه صورة للبشاقرة من ناحية المقاريت وتبدو فيها حركة الناس من البشاقرة الى المقاريت وبالعكس وكذلك هناك اطفال يلعبون كرة القدم ولكن الاكياس شوهت هذا المنظر البديع

وهذه صورة للبقر "بضم القاف" وتظهر الغابة من على البعد

وهذه صورة من ناحية البحر وتبدو الارض التي سببت مشاكل كثيرة ما تزال ارض بور ولم تزرع بعد وتظهر هنا الاكياس بكثرة مكان القيف سابقا وكذلك تبدو منازل العبدلاب واضحة ومنها منزل اخونا ود الدقناوي وناس جماع وبيت ناس غازي

نتفق معك اخ تريتير علي ما ذهبت اليه
ونري اهمية تكاتف الجهود لازالة هذه
الاكياس لكن بالجد الصور دي برغم قساوة
منظرها وشكلها دا لكنها تثير شئ خاص في النفس
ليس لجمالها ولكن لانها متعلقة باسوارالبشاقرة
فهي ترفض الذهاب بعيدا عن البشاقرة كانما تعاتبنا
علي مغادرتنا نحن لها.وعندما تكون بعيداً تحسد هذه
الاكياس علي قربها وتعلقها بالبشاقرة
فلك التحية ياتريتيرعلي التنبيه بالمخاطر
ولك التحية ايضاًعلي الربط المصور
وماتشتغل بكلامنا العاطفي دا لان النظافة
مظهر حضاري وهي من الايمان

يا تريتير بوكا دا متوجع من الغربة وكدة قال الاكياس بتحب البشاقرة
يا بوكا الاكياس دى ما ذكرتك موضوع التاج الطيب
من كثرة هذة الاكياس نفهم بان مجتمع البشاقرة استهلاكى بحت

يا ود الدقناوى توزيع الخبز فى اكياس شئ لابد منة
فى الاونة الاخيرة كثفة المحليات كل جهودها لمنع بيع الخبز فى الاكياس ليس لانها تشوة المدينة فحسب
فعربات النفايات متوفرة فى هذة المدن وقد تم فى الاونة الاخيرة توسيع دائرة عمال النفايات وفرض رسوم
شهرية على المنازل والمتاجر والمؤسسات يعنى الجميع بدفع وحتى عامل النفايات يجد اجرا يكفية وبل يزيد
وان لم تدفع سوف ياتيك انذار وسجن عديل
المهم يا زول وجد الباحثون ان ضرر الاكياس على الاراضى الزراعية اكبر من ضررها على تشوية المدينة
او القرية وبالفعل تم حظر هذة الاكياس فى المناطق الزراعية مثل القضارف والدمازين وحاليا الجزيرة
لكن انت يا ود الدقناوى مفروض تمنعها فى العاصمة اولا حتى الولايات والا شنو
با لنسبة لموضوع الخبز
الخبز بنشف وبتكسر اذا شالوهو فى قفة او سبت وبعض الزبائن بقولو خبز بايت ودى بضرر منها صاحب المخبز
اكثر من ضرر البشاقرة من الاكياس الصورها التريتير دا
بعدين يا ود الدقناوى ماممكن تمش المخبز وانت شايل معاك حاجة فى يدك عشان تجيب فيها خبز
المهم فى الامر سؤ الاستخدام مشكلة ولو فى نظافة شهرية للقربة بكون دا واحد من الحلول

اخونا عبد الحي تحياتي وتقديري
ارى انك تدافع دفاعا مستميتا عن اصحاب المخابز كأنك تمتلك مخبزا فى البشاقرة اليس كذلك؟؟
ود الدقناوي الصورة دي اختها وانا فى الحجرة الكنا زمان بنعوم فيها وبنشرك للسمك وهسع لا في حجرة ولا في سمك
بالنسبة لموضوع الاكياس دا موضوع بسيط جدا فاذا تكاتفت كل الجهود من رابطة ابناء البشاقرة بالجامعات وعملوا يوم لاصحاح البيئة فخلال يومين فقط نلقى البشاقرة خالية منم الاكياس
او تستنفر احدى المدارس طلابها لعمل يوم لاصحاح البيئة ولو فكينا الطلاب ديل والله لو كل واحد قالوا ليهوا جيب خمسة اكياس فارغات لكانت البشاقرة خالية من الاكياس الى الابد
يقال ان الصين عندما ارادات تحارب الذباب قالوا لكل مواطن هات لينا عشرة ذبابات فكانت الصين فى خلال اسبوع خالية من الذباب،،،، 2 مليار اضربها فى 10

لكم خالص الود والتقدير

وهذه صورة ايضا من نفس المنطقة والاكياس هي سيدة الموقف

اعتقد انو ناس الرابطة بدو فى الشغلة دى الجمعة قبل الماضية حيث تم حرق النفايات بالجهة الغربية وهى واجهة المنطقة(البقر)بضم القاف
ايضا السنة الماضية كان يقوم بها فريق الهدف الرياضى اسبوعيا حيث كانو يقومون بجمع النفايات بواسطة عربات بكاسى مقابل فئة رمزية لا تتعدى الالف وخمسمائة جنيه (بالقديم طبعا)لكنهم توقفوا الان
تخريمة:
الاخ ود الدقناوى موضوع الصور زى ماقال ليك الفاتح جاهزة واى حاجة فى الحلة دى صورناها لكن نعمل شنو مع المنتدى دا طاشى طوالى وما بستقبل اى صور لكن محاولاتنا مستمرة وانتظرونا.

يا جماعة كدا اظن ما قصرت معاكم بعد ما نزلت صورتي فوق " الزول اللابس جلابية بيضاء دا هو زاتو التريتير"

يالتريتير شكرا لهذه اللفته البارعه عن الاكياس ونجد ان القرار الحكومي الصادر من ولايه الجزيره خفف كثيرا من الاكياس خيث يعاقب كل من يحمل كيسا بالجلد 50جلده والغرامه 300جنيه ولكن نجد ان المشكله تاتي من الخرطوم فكلحافلات البشاقره القادمه من الخرطوم تحمل علي الاقل 5كيس في 5حافلان =250كيس يوميا ان لحل المشكله جزريا يجب بان يجمع كل بايعي الخضر والجزارات في مكان واحد جملون في محل وسط للمنافسه وبالتالي يكون هنالك سوق مستمر طوال اليوم وتكون الفائده للجميع بما فيها باقي الخدمات من ايجارات السوق

عبد الحي الصورة الواضعها التريتير ما عرفت صاحبها منو حاول ركز عليها شديد . هو عامل فيها تشويه.

يا ود الدقناوى الزول دا ما مسلم بابكر حسن شبة جد يا خوى

يا كاربينو

الزول دا


يشبه


ود الدقناوي

انت ما بتعرف تلعب فى الرملة والا شنو
قال بشبة ود الدقناوى
انا متأكد انو مسلم ومن زمان انا قلت بعرفو وانت قايلها وهمة ولو ما جاب صورتو ما كان عرفتو التريتير

يا زول مسلم شنو

يا اخوي ديل ناس قروش ساي

ان سالتو الكيبورت شنو ما يعرفو

شوف غيرا

ويا كاربينو انت الزول دا عارفو


بطل حركات معاك