البشاقرة....مركز الضيفان.

لفت انتباهى تعليق صدر من شخص لرفيقه الثانى واصفا فيه البشاقرة بانها (زى السودان) واذا تمعنا فى هذا الوصف سنجد ان هذا الشخص محق فيما ذهب اليه فالبشاقرة فى مجال الكرم لا اعتقد بان هنالك منطقة على مستوى السودان تنافسها ,اما على مستوى التعايش السلمى فتستحق وسام النيلين من الطبقة الاولى ,ثم ان الغريب مرغوب فيها حتى يخيل اليك انه من اهلها وقاطنيها والمغالطنا ومامصدقنا يجى يشوف الدكاكين باليل ,ام فى مجال الافراح والاتراح فمجاملات لا تكفى لذكرها السجلات خاصة الاتراح تجد على سبيل المثال الوقفة الكبيرة من المواطنين حيث اذكر ان احد قاطنى القرى المجاورة اتى ليعزى فى احدى الوفيات وكان قد حضر وجبة الغداء وعندما شاهد صوانى واعمدة الاهالى (يطاقشن) صاح قائلا على الطلاق سمحة المقدرة وياريتنى لو ولدونى فى البشاقرة فقال له احد الحاضرين طيب ماتجى ترحل معانا فرد قائلا يازول ماتبالغ انتو مركز المجاملة وانا هسى لو جيت رحلت معاكم الا اشتغل تهريب لانو كل مناسبة عندكم لازام اشارك واجامل فيها عشان كدة الشغلة دى دايرة ليها ميزانية وانا زول وضعى تعبان.
ونحفظ لرجالات البشاقرة روايات كثيرة فى الكرم والاحسان تتحدث بها الركبان لانها فعلا مركز الضيفان وزى السودان.

يا مصعب انا لو قالو لى البشاقرة ذى السودان بزعل والله
انت لو اتمعنتها كويس بتدرك معنى هذا الكلام
الموضوع تمام كلو عدا
ذى السودان
مبروك العلبة

ياعبد الحى اول حاجة شكرا على الرد لانو فى عدد من الاعضاء زعلانين وحالفين تانى مايشاركو والسبب حسب علمى انو اى موضوع مابشارك فيهو عبد الحى الضو مافى زول بشتغل بيهو ولا بعبرو يعنى حسب كلامهم انا اضمن بعد دة انو الموضوع حيلاقى حظو من النقاش,اما بخصوص الموضوع نفسه فالبشاقرة زى السودان فى المجالات الزكرناها عدا موضوع المجاملات فهذه حقتنا برانا ومافى زول بلحقنا فيها,اما مساوى السودان ومشاكلو ماعندنا شغلة بيها .وبعدين الظاهر انك البلد دا ممغوس منو شديد لكن ان جيت للحق ....عندك حق.

كتر خيرك يا مصعب
الناس اليومين ديل مشغولين بالعيد وزول قاعد ادخل مافى لكن دى فرصة للمغتربين عشان افرقو زهجهم
بعدين المنتدى بقى تعبان تكتب موضوع وما تلقى رد شينة يا مصعب بعدين انا رديت لانو عارف مافى زول برد
والله انا بكتب موضوع عشان احصل على رد وبكون متشوق وبفتح المنتدى بمزاج عشان اشوف الردود
والله يا مصعب الحكاية دى ذى الجادع ليك رماى تبيتو وتجيهو الصباح وتشوفو قابض شنو
الكنتة فى الرد صاح يا مصعب

والله ياعبد الحى كلامك صاح الشغلة دى غايتو زى الرماي والرد بحمس الزول على الكتابة ,وقبل شوية لاقانى الحمدى فرحان شديد والسبب انو عبد الحى رد على الموضوع بتاعو رد منطقى رغم انو زعيم المريخاب بالمنتدى , والشئ الذى يجب ان يزكر ان هذا المنتدى عوضنا عن مرارت الجريدة التى كانت محتكرة لاشخاص محددين وبالعافية كدة ينشروا ليك حاجة, اما المنتدى فقد اعطانا الحرية فى كيفية التعبير عن ارائنا كما اننا تمكنا عن طريقه من معرفة اناس لم تكن لنا بهم ادنى معرفة من ناحية سلمهم التعليمى وتخصصاتهم وهل درسوا جامعات ام توقف بهم قطار التعليم ام ام......
وانا غايتو ياعبد الحى اهنئك على المحاولات الشعرية التى لولا المنتدى لما وجدت حظها من التاليف وكمان اقول ليك حاجة واصل فى الشعر دا(ماك طالبابى)ولاشنو .لكن النصيحة ليك يالله بس مايكون فى سيد البلد.
الحاجة التانية غايتو بى طريقتك دى بتتصدر قائمة اميز وافضل واكثر الاعضاء مشاركة.
ياخى اقول ليك حاجة :قيد صحفى احسن.
ملحوظة:بس عيبك مريخابى ..........لكن ليك التحية.

لك التحية مرة اخرى
ذى ما قلت ليك مهما كثرت المهاترات الا ان الرد مهما كانت مرارتة فهو تقيم لكاتب الموضوع
المهم ان نرد وليس ان نكتب موضوع
وان نثير الاعضاء لكى يردو لابد ان تكون ساخر فى بعض المواضيع
اقول ليك حاجة فى مواضيع الناس ما بتحب ترد عليها وهذا يرجع لكاتب الموضوع وليس لتهميش الاعضاء
بعد كدة انا وانت دخلنا فى موضوع تانى الرد حاكون على هذة الردود حسب ما الموضوع اخذ طابع ثانى
وهذة تحسب لك
انا بتوقع اردو المغتربين لكن ناس السودان هنا ما اظن اردو للاسباب التى ذكرناها سابقا
الا اردو عشان انا قلت ما حاردو وكدة انت بتكون جبرت الناس للرد
على اى حال لو عايز تمش لقدام حاول ان ترد اكثر من تاتى بموضوع جديد
والحمدى جانا فى وقت ناس المنتدى مشغولين كان لابد ان ارد علية وما عشان انا مريخابى
والله انا رديت عشان اكون متعلق بالمنتدى
انشالله فى العيد حنلاقى ناس ما لاقيناهم الا فى المنتدى
بس انت ما تظهر مع انتصارات الهلال وكلم معاك الحمدى وما تنقطعو

الاخوان / مصعب 0 عبدالحى
تحية واحترام
والله موضوعكم عجبنى شديد عن كرم وحفاوة اهلنا فى البشاقرة وهذا شى متوارث من جدودنا ويجب المحافظه عليه كلما تقدم بنا الزمن واشتدة المحن نسأل الله السلامةمنها0
اما بخصوص مشاركات الاعضاء فهذا شى يحير لانو ما ممكن كل الاعضاء يكونومشغولين على طول هذه الفترة 0
ختاما تقبلو مرورى والى المزيد
فقدابى

والله موضوع الكرم فى البشاقرة دى نحنا اكتر ناس حاسين بيهو ومتلمسنو باعتبار الفترة التى قضيتها بالمملكة لاننى عندما اتيت الى البشاقرة وجدت فيها البلد التى كنت اتأملها فاهلها طيبون وودودون وكرماء حد الكمال,
واقول للاخ فقدابى حسب مطالعتى للمواضيع الاخيرة بصراحة مسألة انشغال الاعضاء على طول لجد محيرة برغم اننى قد انضممت حديثا الى اسرة المنتدى
وياعبد الحى انا بالفعل اول من اريد لقاءك,وعلبة من علبة تفرق
وتقبلو تحياتى وشكرا على المرور.

انشالله حنتقابل جميعا ونناقش مسألة الهروب من المنتدى لان الكتابة ما جابت حقها
لكن فى ناس اخجلو والله افتحو المنتدى يقراء ويتخارج
والله بتفرق العلب يا الحمدى لو افترضنا كاس السودان علبة كانى حسب كلام الهلالاب
الكاس دا حاكون علبة صلصة